15 عادة قد تجعلك سمينة ! .. 1

11
Want create site? Find Free WordPress Themes and plugins.

صباح | مساء الصحة والجمال ..

قبل شوي خلصت التدوينة هذي وللاسف انحذفت بالغلط وجالسة أكتبها من جديد .. نسيت وش كتبت لاني استرسلت وتكلمت باللي كنت أفكر فيه .. الحين ببدا من جديد اتوقع ان هالتدوينة ماراح تشبه اللي قبلها .. 

قررت أسوي سلسلة عادات خاطئة و أولها سلسلة العادات اللي تزيد الوزن .. هي 15 عادة كتبتهم .. راح أذكر لكم 5 عادات ب هالتدوينة و 5 عادات بالتدوينات القادمة .. قبل ماندخل بالتدوينة .. ودي أوريكم فديو يتكلم عن عادات الأكل الخاطئة اللي ممكن تسبب سمنة مفرطة وممكن تسبب نحافة شديدة .. الفديو شوي مقرف لان بتشوفون كيف السمنة والنحافة تشوه الناس .. ولان اللي بالفديو أجانب ف يطلعون اجزاء من اجسامهم لمن يجون يطلعون على الميزان .. لذلك اقولكم اذا كنتو تقرفون لاتفتحون الفديو .. لكن اذا خايفة من السمنة شوفيه يمكن يوريك كيف السمنة تشوه الجسم ويردعك عن الاستمرار بعاداتك الخاطئة.. مشاهدة ممتعة ♥

فديو نحافة شديدة ضد سمنة مفرطة  ↑

أوكي .. الحين خلونا نبدا بالعادات .. ♥

1 .  عدم حساب السعرات الحرارية اللي تحتاجينها باليوم: 

30.-makanan-rendah-kalori-tips-hidup-sehat

السعرات الحرارية تختلف من شخص لشخص بحسب طول الشخص ووزنه و نشاطه البدني يعني المدربة الرياضة تحتاج سعرات حرارية أكثر من ربة المنزل لانها تبذل جهد بدني أكثر بالتالي تحرق سعرات حرارية أكثر .. لذلك عادي تكثر طالما انها راح تحرقهم .. مو زي ربة المنزل لانها لو كثرت سعرات بدون بذل مجهود راح يزيد وزنها بعكس اللي تسوي رياضة .. واضحة الفكرة؟  مهم تعرفين كم تحتاجين من سعرات حرارية باليوم .. مثلاً أنا وانتي نفس الوزن والطول ونبذل نفس الجهد ونستهلك باليوم 2000 سعرة حرارية .. أنا وانتي قررنا ناكل رغيف خبز على الفطور انا رغيفي اسمر فيه 130 سعرة وانتي ابيض – اللباني-  فيه 70 سعرة .. يعني انتي تنقصين 70 من ال2000 حقتك اليوم لكن انا انقص 130 سعرة من ال2000 حقتي .. وهكذا .. الين نخلص ال2000 حقتنا .. بتقولون لي غريبة ليش الخبز الاسمر اكثر سعرات من الابيض مع انهم يقولون انه صحي اكثر ؟ – طبعاً كل مازادت سعرات الوجبة ابتعدي عنها – لكن بقولك ليش يقولون الخبز الاسمر صحي اكثر.. لان الخبز الاسمر مو مطحونه الحبوب فيه نخالة .. بالتالي المعدة تطول وهي تهضمه مو زي الخبز الابيض بسرعة ينهضم .. ف لأن المعده تطول تهضمه انتي بتقعدين شبعانة ماتاكلين لوقت أطول .. وهذا المطلوب انك تقعدين اطول وقت ما تاكلين ..

بحط لكم رابط موقع وزارة الصحة حاطين اصناف اكل وكم السعرات الحرارية فيها.. هنا  م| عشان تعرفين كم سعرة تحتاجين باليوم زوري اخصائية تغذية تحسب لك او انتي احسبيها اونلاين دخلي طولك ووزنك ومعدل جهدك البدني والعمر ويطلعون لك النتيجة ♥ لذلك غلط ماتعرفين كم سعرة تحتاجين وبس تاكلين بدون علم .. ممكن تزيدين دبل حاجتك وهالشي يزيد وزنك .

2. الأكل العاطفي : 

emotional-eating-e1330986047357

الأكل بسبب المشاعر السلبية أو المزاج السيء أو أحياناً بسبب الطفش حتى ! في ناس اذا ماعندها شي تسويه راحت تاكل حتى لو مو جايعة ! .. صديقتي تعاني من مشكلة وهي الأكل العاطفي .. بسبنة من السنوات زادت 15 كيلو لانها مرت بظروف سيئة .. فكانت تنسي نفسها بالأكل أو على قولتنا ” تتسلى بالأكل” .. فيه ناس لمن تتضايق تهجر الأكل حتى لأيام و أنا منهم .. لمن أتضايق انسى ان فيه شي اسمه أكل أو نوم وهالشي متعب ومضر جداً .. أنك تهجرين الأكل أو تهربين من مشاكلك للأكل كلها غلط بغلط .. وكل الحالتين تسبب السمنة .. حتى عدم الأكل ممكن يسبب سمنة أو على الأقل ثبات الوزن يعني ماينزل .. لان الجسم يحس انه بخطر ومايجيه غذا فيحتفظ بالدهن عشان يستمد منه الطاقة . حاولي تتغلبين على هالعادة سواء كانت هجر الطعام أو الإفراط بتناوله بسبب المشاعر .

3 . الأكل المشتت : 

تدرسين؟ تشوفين تلفزيون؟ فلم؟ تكلمين فون أو واتس ؟ تقرين تدوينتي هذي وجنبك أكل ؟ أو تشربين شي غير صحي ؟ هنا صاير الأكل يدخل بكل شي ماله نظام ولا وقت .. بكل وقت ناكل .. و أي نشاط نبي نسويه لازم ناكل .. فيه بنات عشان تذاكر للاختبار لازم تفرش جنبها مائدة وكلها جنك فود للأسف .. حتى الحفلات الحفلة بالسعودية يعني أكل ههههههه فيه صورة انتشرت قبل فترة موتتني ضحك بحطها لكم ↓

IMG_4482

ههههههههههههههههه على الجرح والله !! أحس الصورة تكفي مافي داعي أعلق

 

4 . الأكل خارج المنزل بكثرة:

و أنا أتكلم عن هالفقرة أتذكر وحدة يارب أنها ماتقرا البوست ههههههههه إذا قريتيه و عرفتي إني أقصدك حابة أقولك هاااي  .. ماعلينا , الله يسعدها كانت تتأخر عن الدوام كل يوم عشانها لازم تفطر بمطعم وتجي   ياريتها هي بس حتى بناتها بالجامعة معنا يأخرون محاضراتهم عشان يفطرون برا ويجون .. ليش ليييشش   ياريته فطور وبس حتى العشا مايتعشون بالبيت والمصيبة انه مو بس هم لا صاير المطعم بالسعودية مو مكان للأكل صاير مكان للطلعات والجمعات .. يعني طفشانيين؟ يلا نروح مطعم .. تبين تطلعين انتي وصحباتك ؟ يلا مطعم وهكذا .. مدري هل جوي بيض أو جو عجايز ماعرف بس أنا ضد ” الإفراط” بطلعات المطاعم 🙁 إذا ودي أطلع مع صديقاتي نروح شوبنق سوا أو نروح نسوي سبا .. ممكن نطلع مطعم لكن مرتين ثلاث مش يومي ..

5 . عدم وضع قائمة عند شراء التسوق : 

cdn-write.demandstudios.com-upload--image-17-08-FA5FF9FF-262A-4803-A1C3-26FE45260817-FA5FF9FF-262A-4803-A1C3-26FE45260817

التسوق اللي أقصده هنا هو تسوق الطعام يعني السوبر ماركت , لاحظت لمن اروح بدون قائمة الاقي نفسي شريت اشياء مالها داعي واغلبها جنك فود .. حلو تسوين قائمة لايش ناوية تطبخين او تاكلين هالاسبوع .. وتطلعين تجيبين احتياجاتك .. انا احب احط قائمة وامشي عليهم حبة حبة .. الاقيني خلصت بسرعة وشريت اللي ابغاه لان الفرفرة بين الرفوف بدون هدف تخليك تشترين اشياء انتي ماتحتاجينها .. بالتالي مضيعة وقت وفلوس وقلة فايدة هههههه , الاجنبيات برا تخطط اكلها وتللاسبوع كامل مرة مفيد تعرفين وش بتاكلين تحسين حياتك منظمة وجسمك خفيف .. مو زي لما تاكلين بعشوائية .

 

بكذا نكون خلصنا أول 5 عادات خاطئة اكتبو لي بالتعليقات تحت رايكم إذا مع أو ضد .. و إذا ودكم نكمل ال10 عادات الباقية ..

دمتم بخير وصحة ♥

 

 

//pagead2.googlesyndication.com/pagead/js/adsbygoogle.js

(adsbygoogle = window.adsbygoogle || []).push({});

Did you find apk for android? You can find new Free Android Games and apps.

Discussion11 Comments

  1. صح كلامك
    بس الاكل متعه هههههههههههههه
    حساب السعرات هالشي اللي مستحيل اسويه
    احس اني مقيده جدا
    انا نحفت كثير الحمد لله و اسوي رياضه
    5 الى 6 مرات اسبوعياً
    بس عمري ماحسبت السعرات

  2. موضوع روعه ياليت البنات بفهمون ان الجمعات مو بالاكل انا اعاني من هذا الشي وصعب اروح لهم واشوف انواع الحلا ومااكل لازم حمله تثقيفيه للبنات كفايه فشخره بانواع الحلا ولازم تجيب شي جديد ومميز..زمان كنا نحط انواع التمر وتكفي اللحين يارب لك الحمد

  3. بصراحه اعجبني الموضوع ومتحمسه للعادات ال١٠ الباقيه
    العاده الاولى بصراحه مااسويها ولا احسب سعراتي فعلا هالشيء غلط 🙁
    اما العاده الثالثة الاكل المشتت ههههههههههههه ضحكتني الصوره فعلا المقارنه قاتله لكن للأسف هذا اللي صاير
    اشوف بكلل جمعه للصديقات او حتى جمعه العايله انواع واشكال من الحلى والسعرات وكلل الجوالات تصور مبسوطين بسعراتهم حتى ممنوع احد يلمس الاكل تصور كل وحده السفره وترسلها سناب .. صار اجباري عندنا بما ان شعب السعوديه أغلبهم شعب أكول .. و ما أعمم ..
    مره كنت أتكلم مع وحده من المدربات الاجنبيات بالجيم .. كنت حاطه ببالي وزن معين أتمنى أوصل له (٤٩كيلو)
    قالت أفضل لك لكن اكتشتفت ان السعوديات مايحبون الجسم ال too skinny ومو هدف يطمحون له
    زعلت صراحه ان نظرتها لنا بهالشكل لان ماكنت حابه تأخذ عننا هالفكره أبد

    وبالنسبه لي لازلت في رحله للوصول لوزني المثالي
    كلي شكر لك ولجهودك وبانتظار التدوينتك القادمة

  4. مرحبا..شكرا لك عالافادة
    عندي سؤال انا عندي امتلاء في منطقة(المؤخرة) وابغى تمرين يخففها
    شكرا

  5. مساء الخير عجايب ♡.
    مرره حبيت التدوينه .
    انا من الناس الي وزنهم ثابت والحمدلله وزني اعتبره مثالي ومتناسق ، وبعدها بديت اسحب ع اشياء مهمه وبعضها ذكرتيها بالتدوين وعذري انو جسمي تمام التمام .
    بالفتره الاخيره حسيت طلع لي بروز ف منطقة الخصر من وراء فوق المؤخره 😐
    من عاده الجلوس بظهر منحني ، اميل بجلستي .
    وجالسه اشتغل ع هالمنطقه
    وان شاء الله نلتزم ونبطل عادات سيئه

    شكرا مره ♡

  6. كلامك مره روووعه استفدت كثير منك الله يسعدك وننتظر العشر العادات الباقيه

  7. اسوأ عادة هي لما نجتمع مانوقف اكل وهو الشيء اللي يزيد وزننا

    عجايب معليه ابي استيشرك انا عمري ٢٠ ووزني ٥٤ وطولي ١٦١
    الحمدلله فيني خصر وتقاسيم جسمي حلوه بس مشكلتي لي فتره صار فيني كرش وهالشيء مضايقني مره! وش تنصحيني بتمارين عشان اشيل دهون البطن واشد جسمي كله!

Leave A Reply