Menstrual Cup – Tampon حل جديد للدورة الشهرية يستاهل التجربة ؟

15
Want create site? Find Free WordPress Themes and plugins.

 

Period Cups

 

صباح الحب والخير على الجميلات..

وخصوصاً اللي تقرا موضوعي وعندها الدورة ♥

الدورة وما أدراك ما الدورة .. على مدى العصور اللي راحت والمرأة تعاني مع الدورة، مستحيل مهما كانت خبرتك طويلة معها ماتتوترين وما تحسبين حساب لبسك أثناء الدورة.. والأدهى والأمر إذا كنتي تبين تسبحين هههههههه مافي أمل وقت الدورة !! يا ما راحت علينا شاليهات واستراحات بسبب الدورة .. نجلس نتفرج بس 🙁 مع تطور كل شي في الحياة صار لازم تتطور حلول الدورة بعد ! اليوم موضوعنا عن شيئين من اختراعات الدورة الأول  يسمى | Menstrual Cup | أكواب الحيض !! والثاني يسمى | Tampon| .. أيش هي ؟ كيف تستخدم؟ هل هي أفضل من فوط الدورة العادية؟ تابعي القراءة .. ♥

التامبون |Tampon | يعتبر وسيلة قديمة نوعاً ما صار لها 50 سنة تقريباً  لكن ما انتشر الا في وقت متأخر ويمكن بوطننا العربي 10% يمكن اللي يعرفون عنه .. ومافي غير مكان واحد يبيعه هنا بالسعودية .. ماراح أتكلم عنه بهذي التدوينة .. راح أخصص له تدوينة ثانية لأن الموضوع يبي له جلسة و مابي أظلم الموضوع لذلك فصلته عن أكواب الحيض .. أكواب الدورة تعتبر جديدة نوعاً ما وانتشرت بآخر ال5 سنوات الأخيرة.

ماهي أكواب الدورة؟

نقدر نعرفعها بأقماع أو أكواب تشبه شكل الجرس مصنوعة من السيليكون عادةً تضعها المرأة في المهبل أثناء الدورة الشهرية ليصب فيها دم الحيض. في الخارج أي أحد يقدر يستخدمه لكن عندنا العرب ماينفع إلا للمتزجات لأنه يدخل جوا المهبل بالتالي مايصلح للجميلات اللي مابعد تزوجو للأسف.

الفرق بين أكواب الدورة و فوط الدورة العادية؟ 

yes2-01.png

طريقة الاستخدام:

طريقة الاستخدام يبي لها شرح مصور، قبل تبدين تشترين المنتج لازم تعرفين أنه يدخل جوا المهبل، فلو أنتي مستعدة تستخدمينه تابعي معي هالفيديوز تشرح لك الطريقة بشكل أفضل من الكتابة:

https://www.youtube.com/watch?v=qgdPI7oqmRE

http://www.medicalvideos.us/videos/6639/how-to-use-a-menstrual-cup

هل هو صحي + طريقة التنظيف ؟ 

إذا استخدمتيه بطريقة صح فهو صحي لأن السيلكون المستخدم فيه سيلكون طبي.. ولازم تعرفين أنك ماتلمسينه الا ويدك مغسولة كويس وبمويه حارة عشان مايكون فيه بكتيريا و أيضاً بعد ماتطلعينه من المهبل ويكون مليان دم اغسلي الكوب كويس بموية حارة أيضاً ولا تخافين عليه من الحرارة لأنه سيلكون زي ما قلنا واغسليه بصابون خاص بالكوب [بعض الشركات مثل ديفا كوب توفر صابون خاص بالأكواب حقها] أو استخدمي سائل التنظيف الخاص بالمهبل حقك .. و طبعاً سائل تنظيف المهبل لازم يكون خالي من الصابون وخالي من العطور .. إذا حابة تعرفين اكثر اقري تدوينتي حقت العناية بالمنطقة الحميمية .

و أيضاً ممكن بنهاية كل دورة تغلين الكوب بموية حارة وتجففينه وتدخلينه بالكيس حقه [يجي معه زي الكيس قماش ممكن تحطين الكوب بشنطتك ايضاً].. السؤال اللي يطرح نفسه : هل يوسع المهبل وجود جسم كبير فيه لمدة اسبوع؟ طبعاً حتى الأمريكيات يقولون نفس السؤال.. والجواب هو أن الكوب مصنوع من سيلكون طبي يعني لييييين جداً وزيادة على كذا انتي لما تدخلينه يكون مثني وصاير حجمه صغير .. بمعنى انه مقارب لحجم العضو الذكري لذلك لاتقلقي من هالناحية.

التقييم العام:

بما أنه أرخص و مايعقدك بالحياة ولاتشيلين هم ان لبسك يتوسخ أو مكان لتغيير الفوط بكل طلعة [أنا من الناس اللي أكره أطلع بوقت الدورة لأني أكره استخدم الحمامات العامة بالمولات وغيرها أخاف من البكتيريا].. إذاً ليش ما نستخدمه؟ .. لكن لو حاسة أنك بتهملين بتنظيف الكوب وتشوفين أن الفوط أريح لك إذاً خليك على الفوط أأمن لك.

وبس كذا خلصت تدوينة اليوم شاركوني رايكم بالتعليقات .. هل راخ تستخدمينه ولالا وليش؟

سلام ♥

 

Did you find apk for android? You can find new Free Android Games and apps.

Discussion15 Comments

  1. يعطيك العافيه بس ما راح تستخدمه لأني صراحه اتعودت على الفوط و اهتمامي بنظافتي لكن استخدمهم

  2. مستفيدة

    تدوينه جدا مفيدة نفسي استخدمو بدات اني زيك ما احب ادخل حمامات عامه وأيام دراستي اطر اقعد بفوطه اكتر من ٨ ساعات بس ايش أعمل اتمنئ اجربها بس للأسف متخوفة كيف ادخلها

  3. مااعتقد استخدمة فكره حفظه وتفريغي للي فيه وغسيله شوي مقززة

  4. اشوف على حسب حكمة الشرعي
    لان حرم الشرع الجماع وقت الدورة
    غير ان الموضوع مخيف شوي

    • مافهمت اش دخل الجماع بالموضوع؟ قصدك أنه يدخل جوا المهبل؟ الشرع حرم عشان القرف اللي يصير من الجماع ،قت الدورة واللي ممكن يكون مؤلم للمرأة ومقزز للرجل

  5. ناديه فايز

    يعطيك العافيه بس سؤال هل يصلح استعماله مع اللولب ؟ وهل صحيح ممكن يقلل ايام الدوره ؟

  6. غادة الحربي

    ماراح استخدمه حاليا ..اخاف يدخل وماقدر اطلعه …وكمان احسة مو مريح …وانا حاليا مركبة لولب ..اخاف مايناسبني

  7. مرحبا عجايب ..صراحة تدويناتك جميله و مفيدة
    بالنسبه للحل ابدا مو مريح و سوء استخدامها يسبب التهابات افضل الفوط ❤

  8. من فين نحصلها هنا احد يعرف ؟
    بالعكس تحمست اجربها لظروف العمل و البقاء برا وقت طويل اكره عمري وقت للدورة و انحبس و اشيل هم كبير

  9. موجودة في اَي هيرب وامازون ومتحمسه اجربها بس متخوفه شوي اخاف تطيح هههههه أو تسبب توسع مع انه أحسه حل كويس مره

  10. دخلت تدوينتك لاني كنت اشوف تجارب اجانب عنها وقلت اشوف هل في وحده عربيه جابت له سيره ولقيتك..
    بس اللي خلاني أدور عن تجربتك هو موضوع ثاني.
    انا شفت أجنبيات يذكرون انه هالكوب ساعدهم يحملون بسرعه لانهم يستخدمونه بعد الجماع مباشره فبدل ماينزل السائل المنوي على طول..يظل في الكوب مما يسمح للحيوانات المنويه بفرصه أكبر هذا والله اعلم وبجربها بإذن الله بخصوص هالشيء..اما وقت الدوره فما ارتحت للفكره بالرغم انه صُنع لها.

Leave A Reply